Во ЈУ. Детскиот културен центар-„Карпош“ беше отворена изложба на цртежи и честитки изработени од најмалите, децата од предучилишните установи од Скопје. Оваа година творбите беа под мото - Љубов и насмевка за сите жени.
Изложбата се одржа по повод празникот 8 Март - Меѓународен ден на жената и е дел од музичко креативниот настан „Играм и пеам за мојата мајка“.
На наша покана, од градинките пристигнаа прекрасни ликовни творби кои ги изработија најмалите, децата од скопските градинки. Преку нивните творби (честитките и цртежите) се рефлектираа нивните чисти и нежни чувства, а исто така може да се види колку далеку одат детската креативност и фантазија, но и како тие си ја замислуваат својата мајка-жената и која е нејзината улога во нивниот живот.
Покрај изложбата за децата од градинките беше организирана и пригодна програма. Оваа година гостинка во ДКЦ-Карпош беше Ива Матиќ, единствената жена - пилот на воен авион, а сега пилот на авион од комерцијален тип на компанијата Wizz Air. Ива одговараше на многуте прашања поврзани со нејзината професија, но исто така им објасни на децата како се управува со авион и дека секоја жена може да биде успешна во било која професија за која ќе се определи.
Изложбата беше отворена во просториите на ДКЦ „Карпош“ на 07.03.2025 година со почеток во 10:00 часот.
ИГРАМ И ПЕАМ ЗА МОЈАТА МАЈКА е музичко - креативен настан, што Детскиот културен центар - „Карпош“ со помош и поддршка на Град Скопје традиционално го организира и реализира по повод на меѓународниот ден на жената - 8 март.
